Кентау қалалық полиция бөлімі қызметкерлері мотокөліктердің қатысуымен орын алатын жол-көлік оқиғаларының алдын-алу мақсатында мотоцикл, скутер, мопед жүргізушілеріне жылдамдықты асырмай, жол жүрісі ережесін қатаң сақтау бойынша шаралар қабылдап, тұрғындар арасында түсіндірме жұмыстарын жүргізуде.
Полиция қызметкерлері шара аясында бірқатар құқық бұзушылықтардың жолын кесті. Тәртіпті жіті қадағалайтын полицейлер жол ережесін бұзған 42 мопедті анықтап, жүргізушілеріне немесе заңды өкілдеріне шара көріп, айыптұраққа қойды.Тәртіп сақшылары жол қауіпсіздігін қамтамасыз ету, қылмыстың алдын алу және оны болдырмауға күш салуда.
Мопед – көлемi 50 текше см-ден аспайтын мотормен қозғалысқа түсетін көлік. Екi немесе үш дөңгелектi, ал ең жоғары конструктивтi жылдамдығы сағатына 50 шақырым болады. Мопедке аспалы қозғалтқышы бар велосипедтер және осындай сипаттағы басқа көлiк құралдары жатады. Күнделікті қаржы үшін қолданысқа ыңғайлы әрі жанар-жағармайды да көп қажет етпейтін мопед қарапайым халық үшін «құтты көлік» болып тұр. Мопед мінген жүргізушілердің дәрежесі велосипед айдаушылармен тең болғандықтан барар жеріне тез жету үшін арнайы жолақты басып өтіп, автомобиль жолдарын пайдаланады. Кептелісте кедергісіз қозғалатын бұл көлік түріне төнер қауіп те аз емес.
Былтыр 30 тамызда күшіне енген «Жол жүрісі туралы» заңдағы түзетулер мен 18 қыркүйекте жол ережесіне енген өзгеріске сай мопедші тротуар немесе жол жиегімен ғана емес, веложол және веложолақпен де жүре алмайды. Жол ережесінде мопедшіге арналған шектеулер бұл ғана емес. Мопед мінген адамға мыналарды істеуге болмайды: рөлді кем дегенде бір қолмен ұстамай жүргізуге, жолаушы тасуға (жолаушы тасуға арналған арнайы орны болмаса), жүк тасуға (жүк тасуға арналған арнайы құрылғысы болмаса, сондай-ақ жүктің ұзындығы мен ені 50 сантиметрден асса және алып жүргенде қиындық тудыратын болса), трамвай жолы бар және бір бағыттағы жолақ саны бірден көп жолда солға немесе кері бұрылуға, мопед, электросамокат, велосипед сүйреуге (мопедпен сүйреуге арналған тіркемені қоспағанда), қараңғы уақытта өзге көлік жүргізушісіне көрінетін жарық шағылыстыратын зат тақпай жол бойында жүруге тиым салынады.Жол ережесінің 24-бөлімі, 1 тармағында мопедті тек 16 жасқа толған адамдар жүргізе алатыны жазылған. Соған қарамастан соңғы уақытта қала көшелерінде 16 жасқа толмаған балалардың скутер және электросамокат айдауға рұқсат жоқ бола тұра, осы көлік түрін басқарып жүргенін жиі көреміз. Тәртіпті ескермеу салдарынан жол апаты болып жатқан жайттар да аз емес.
Негізгі заң жобасына сәйкес, мопед жүргізушілері Әкімшілік құқықбұзушылық туралы кодексте көзделген баптарға сәйкес толық жауапкершілікке тартылады. Бұл норма мас күйде мопед қолданған жүргізушілер санын, мопедтердің қатысуымен болатын жол-көлік оқиғалары мен жарақат алуды азайтуға бағытталған. Мұнан басқа мопед жүргізушілерін толық жол қозғалысына қатысушыларға теңестіру ұсынылып отыр. Бұдан былай азаматтар мопедтерді басқару үшін уәкілетті органда міндетті тіркеуден өтеді. Сонымен қатар, «А1» санатындағы жүргізуші куәлігін алып, жыл сайынғы техникалық байқаудан да өтуі тиіс. Көлік құралдары жүргізушілері азаматтық-құқықтық жауапкершілігін міндетті сақтандыруды рәсімдеуі қажет. Жергілікті атқарушы органдарға электр самокаттарды пайдалану тәртібін анықтау өкілеттігі беріледі. Жол ережесі мен «Жол жүрісі туралы» заңның бұрынғы нұсқасында мопедші шлем киюге міндеттелмеген. Ол мотоцикл жүргізушісіне міндетті болатын. Енді жол ережесінің 24-бөлімі 171-тармағының 8-тармақшасында мопедшіге шлемсіз жолға шығуға тыйым салынады. Ережеде шлем қандай болу керегі нақты жазылмаған, бірақ мопедші E стандартынан төмен емес жарамды сертификаты бар жоғары сапалы шлем киюі қажет. Мұндай жабдық сәл қымбат болатыны анық, бірақ жазатайым оқиға болса, қауіптен қорғайды.
