Мемлекеттік қызмет істері агенттігінің “Рухани жағыру” бағдарламасы аясында басталған “Үздік ауыл әкімі” республикалық байқауы аяқталды.
“Үздік әкім Алматы облысы Іле ауданы Боралдай ауылының әкімі Данияр Қоңырбаев болды. Данияр Қоңырбаев бірінші орынды жеңіп алды. Ол дауыс беру кезінде ең көп ұпай жинап, өз аймағының әлеуметтік-экономикалық жағдайын жақсарту жобасын сәтті қорғады”, – деп хабарлады агенттік.
Екінші орынды екі әкім – Ақмола облысы Целиноград ауданы Мәншүк ауылының әкімі Ғани Исаев пен Ақтөбе облысы Мұғалжар ауданының Талдысай ауылының әкімі Қазбек Аққайыр бөлісті.
Үшінші орын екі әкімге – Павлодар облысы Ақтоғай ауданының Жалаулы ауылының әкімі Азамат Медетовке және Шығыс Қазақстан облысы Жарма ауданының Шалабай ауылының әкімі Жанар Есембаеваға берілді.
Сондай-ақ “Үздік алеуметтік-экономикалық жоба” номинациясында Жамбыл облысы Тұрар Рысқұлов ауданы Абай ауылының әкімі жеңіске жетті, “Халыққа ашық әкім” номинациясында Қарағанды облысы Бұқар жырау ауылының әкімі ең үздік деп табылды.
“Байқаудың мақсаты – елдің ауылдық жерлерінде жергілікті өзін-өзі басқаруды дамыту, жергілікті бастамаларды, оның ішінде қоғамдық өзін-өзі басқару ұйымдарын ынталандыру, өз жұмысында жоғары практикалық нәтижелерге қол жеткізген, ауылдық елді мекендердің дамуына айтарлықтай үлес қосқан үздік ауыл әкімдерін анықтау және көтермелеу”, – деп қосты мемлекеттік қызмет істері агенттіктің баспасөз қызметі.
