«МЕНІҢ ҚАЗАҚСТАНЫМ» ӘН БАЙҚАУЫ АЛҒАШ РЕТ ТҮРКІСТАНДА БАСТАЛДЫ

Түркістан облысында дәстүрлі Ш.Қалдаяқов атындағы «Менің Қазақстаным» облыстық ән байқауы басталды. Алғаш рет Түркістан қаласындағы өтіп жатқан шара Р.Сейтметов атындағы сазды драма театрында өтуде. Тарихы 1992 жылдан басталған байқау осымен 23 рет ұйымдастырылуда. Талай талантты танытқан додаға барлық ауданнан кіл мықтылар іріктеліп алынған. Қорытынды облыстық жарысқа 22 үміткер келіп отыр.
Байқаудың мақсаты – Шәмші Қалдаяқовтың шығармашылығын жастар арасында кеңінен насихаттау, дәріптеу, шалғайда жатқан ауылдардағы талантты әншілерді анықтау. Ән додасына композитор, Шәмшітанушы Қалдыбек Құрманәлі, ҚР Композиторлар Одағы облыстық филиалының төрайымы Құралай Сәтмұханбетова, ҚР Мәдениет қайраткерлері Әбдіхан Нұрмаханбетов, Айжан Тәженова, композитор Әлімбай Ботақараев қазылық етеді.
Дәстүрлі өнер додасының бірінші кезеңінде instagram әлеуметтік желісінде 15-29 жас аралығындағы қатысқан үміткерлер арасынан халықтың ең көп дауысын (лайк) жинаған 20 үміткер байқаудың ақтық кезеңіне өткен. Енді бүгін ел арасында дауыс жинаған үміткерлер қазылар алдында өнерлерін көрсетеді.
Байқаудың қорытындысы бойынша Бас жүлде (400 000 теңге), І орын (250 000 теңге), ІІ орын (150 000 теңге), ІІІ орын (100 000 теңге) тағайындалады. Сонымен қатар, Түркістан облысы әкімінің арнайы жүлдесі (150 000 теңге); үздік патриоттық тақырыптығы ән орындағаны үшін – «Менің Қазақстаным» жүлдесі (30 000 теңге); үздік вокал үшін – «Ақмаңдайлым» жүлдесі (30 000 теңге); үздік музыкалық өңдеу үшін – «Ақсұңқарым» жүлдесі (30 000 теңге); көрермен көзайымына – «Бәрінен де сен сұлу» жүлдесі (30 000 теңге); «Ең жас орындаушы» жүлдесі (30 000 теңге) және ынталандыру сыйлықтары беріледі.
Байқаудың марапаттау рәсімі мен Гала-концерті Р.Сейтметов атындағы сазды драма театрында сағат 17.00-де өтеді. Гала-концертке Ш.Қалдаяқов атындағы облыстық филармония мен облыстық опера және балет театрының әншілері, «Тұмар» би ансамблі мен балет тобы қатысады.