Аудан әкімдігінің үлкен мәжіліс залында өткен жиынды аудан әкімі Болатбек Қыстауов ашып, жүргізіп отырды.
–Өткен аптада, 5 қазан күні Қазақстан Республикасының Президенті, Елбасы Нұрсұлтан Әбішұлы Назарбаев «Қазақстандықтардың әл-ауқатының өсуі: табыс пен тұрмыс сапасын арттыру» атты Қазақстан халқына арнаған Жолдауын жария етті. Елбасымыздың Жолдауы – жыл сайынғы елеулі саяси оқиға. Жолдауда Мемлекет басшысы мемлекеттің ішкі және сыртқы саясатының негізгі бағыттарын, елдің ағымдағы қоғамдық-саяси, әлеуметтік-экономикалық ахуалын талдай отырып халықтың әл-ауқатын одан әрі арттыру шараларын айқындап берді. Жалпы жылдағы дәстүр бойынша Елбасы Жолдауын түсіндіру және насихаттау мақсатында аудандық ақпараттық-насихаттық топтар құрылып, жыл бойы кезең-кезеңмен жұртшылықпен кездесулер мен талқылаулар өткізетін болады.
Бүгін осындай мақсатпен Елбасы Жолдауын насихаттау және түсіндіру мақсатында ауданымызға облыстық ақпараттық-насихаттық топ мүшелері келіп отыр, – деді Болатбек Дүйсенбекұлы.
Қала, ауыл әкімдері мен мекеме басшылары, зиялы қауым өкілдері, үкіметтік емес ұйымдар мен қоғамдық ұйымдардың жетекшілері қатысқан кездесуде облыстық ақпараттық-насихаттық топтың мүшесі Бақытжан Әшірбаев, аудандық ардагерлер Кеңесінің төрағасы Тоқсанбай Бердібеков, қаладағы №1 М.Әуезов атындағы жалпы орта мектебінің директоры Еркінәлі Ақбердиев, Жаушықұм ауылдық емханасының аға дәрігері Қабылан Ермекбаев, аудан жастары атынан Әйгерім Бердалиева сөз сөйлеп, Елбасы Жолдауында айтылған халықтың әлеуметтік жағдайы, табыс пен тұрмыс сапасын жақсартуға бағытталған қадамдарды жан-жақты түсіндіріп өтті. Облыстық ақпараттық топтың мүшесі Әбдірахман Тасыбаев насихат жұмысын қорытындай отырып, облыста атқарылып жатқан шаруалармен де көпшілікті хабардар етті.
Жиын соңында аудан әкімі Болатбек Қыстауов Елбасы Жолдауынан туындайтын міндеттерді іске асыруға шардаралықтар бір кісідей жұмыла отырып еңбек ете беретіндерін жеткізді.
