Өздеріңізге белгілі, Түркістан облыстық мәслихаты әлеуметтік-мәдени даму, мемлекеттік-құқық, жергілікті өзін-өзі басқару және депутаттық этика мәселелері жөніндегі тұрақты комиссиясының мүшелері құрамынан уақытша депутаттық комиссия құрылған. Бүгінде, арнайы топ өңірдегі аудандарды аралап, спорттық нысандардың жәй-күйімен танысу жұмысын қарқынды түрде жалғастырып келеді.
Кезекті аралау, Түлкібас, Төлеби, Сайрам аудандарында жалғасты. Бүгін Облыстық дене шынықтыру және спорт басқармасына қарасты спорт нысандарын аралауға шыққан арнайы комиссиялық топ, үш бірдей ауданға барды. Түлкібас ауданында аталмыш комиссияның төрағасы Алмас Салимов бастаған бір топ депутаттар қатарында облыстық мәслихат депутаты Д.Егамбердиева және Түлкібас ауданы әкімінің орынбасары Е.Орманов болды. Олар жаңа ғимаратты қажет ететін, материалдық – техникалық базасын жаңарту қажеттілігі туындаған аудандық «№3 балалар мен жасөспірімдер мектебі» коммуналдық мекемесіне бас сұқты. Мәселен, Іргесі 1904 жылы қаланған ескі ғимараттың әбден тозығы жеткен бүгінде. Нысан арнайы спорттық мекеме үлгісінде салынбағандығы тағы бар. 19 ғасырдың үлгісінде қалған спорт нысанын комиссия мүшелері назарға алып, арнайы ұсыныс ретінде қарауға алды. Бұл күні, аудандағы бірқатар спорттық нысандарды көзбен көріп, жағдайымен танысқан комиссия мүшелерін Түлкібас ауданының әкімі Н.Ізтілеуов арнайы қабылдады. Басқосуда тұмса табиғаты тамаша Түлкібас ауданының спорт саласындағы өзекті мәселелері айтылып, бірқатар ұсыныстар талқыланды.
Осыдан кейін уақытша комиссиялық топ Сайрам ауданына барды. Сайрамда аудан әкімінің орынбасары М.Оразалиев халық қалауларымен бірге нысандарды аралады. Олар Ақсукент ауылындағы «Ақсу жекпе-жек» спорт клубында болып, «Сайрам аудандық №2 балалар мен жасөспірімдер спорт мектебі» КММ-нің жұмысымен де танысты. №2 спорт мектебінде арнайы киім ауыстыратын және жуынатын бөлмелері жоқ. Оны шешудің басты жолы мекемеге қаржы бөлуді қарастыру қажет.
Сондай-ақ, Төлеби ауданында Төлеби аудандық мәслихатының төрағасы Н.Қойбағаров спорт саласындағы проблемаларды арнайы құрылған топпен бірге аралады. Аралау барысында, комиссия мүшелері аудандағы Мадени ауылының тұрғындарымен де кездесті. Жергілікті халық депутаттарға ауылдағы ескірген спорт залдың жағдайын баяндады. Жастардың спортпен шұғылдануына жағдай жасап берулерін сұранған халық, заманауй спорт зал құрылысын жүргізіп берсе деген өтініштерін айтты. Халықтың талап-тілегіне құлақ асқан комиссия мүшелері мәселені алдағы уақытта сессия қарауына ұсынатындарын айтты.
Айта кетейік, комиссия осы аудандардағы спорт мекемелерін аралау барысында спорт мектептері мен стадиондарының қызметімен танысып, қызметкерлердің ұсыныс-тілектерін тыңдап, ол туралы алдағы уақытта тұрақты комиссия отырысында талқылайтын болады.
