«Ауыл» ХДПП Түркістан облыстық мәслихатына кандидат Нұралы Дәулетияров Шымкент қаласындағы «Рахат» өндіріс фабрикасында үгіт-насихат жұмыстарын жүргізді. Үміткер кондитерлік фабрика жұмысымен танысқан соң, қызметкерлерге партияның сайлауалды бағдарламасының басымдылықтарын баяндады.
Ұлт қауіпсіздігі аясында ГМО енгізілген тағамдардың, жеміс-жидектердің шетелден кіргізілуі немесе өндірілуіне тосқауыл қою жұмыстарына назар аударатыны жайлы айтты. Елімізде өндірілетін, сонымен бірге, шетелден әкелінетін және өткізілетін азық-түлік тауарлары сапасының Қазақстан Республикасының тамақ өнімдерінің қауіпсіздігі туралы заңнамасында белгіленген талаптарға сәйкес болуы да партия назарында болатындығын жеткізді.
Сондай-ақ, аграрлық азық-түлік нарығына қол жеткізу үшін тең бәсекелестік ортаны құру, мемлекет пен жеке кәсіпкерлік субъектілерінің өзара іс-қимылы мен ынтымақтастығы болуы, азық-түлік қауіпсіздігін қамтамасыз ету мәселелерінде қоғамдық бірлестіктердің, кәсіпкерлер қауымдастықтарының рөлін арттыруға «Ауыл» халықтық-демократиялық патриоттық партиясы ерекше назар аударатыны жайлы баяндады.
